Тус баг нь анх 1992 онд 200-аад өрхтэй, 800 гаруй хүн ам, 2000 гаруй толгой малтай, Засаг захиргааны анхан шатны нэгж болон “Бичигт” хэмээх нэртэйгээр байгуулагдсан. Анхны багийн засаг даргаар Д.Сүхбаатар (1992-1996)  Б.Наранцэцэг (1996-2000), Д.Пүрэвбат (2000-2001), Д.Ганболд (2001-2004), Т.Хоролсүрэн (2004-2017) онуудад ажиллаж байв. Тус багаас хөдөлмөр амжилт бүтээлээрээ шалгаран улс, аймаг, сумын аваргууд олон төрөн гарсан байна. Тухайлбал залуу үе бидний бахархал, үлгэр дууриалал болсон МУ-ын Хөдөлмөрийн Баатар Г.Чунаг, М.Чимгээ, Улсын 3 удаагийн аварга трактор комбайнч Р.Даваахүү, Улсын аварга малчин Ц.Долгор, Д.Нандинцэцэг, С.Авирмэд, Улсын аварга тууварчин Б.Хорол, Улсын аварга саальчин Х.Цэрэндолгор, Х.Буяннэмэх, Улсын мэргэжлийн 2 удаагийн аварга саальчин Л.Ганбилэг, Улсын аварга тариаланч Б.Нямдорж, Аймгийн хошой аварга 5,6,7-р 5 жилийн гавшгайч саальчин Ц.Дашмаа, Аймгийн аварга малчин Н.Цэдэнбал, С.Нямхүү, Аймгийн аварга фермер О.Батаа, Ц.Даваадорж, Аймгийн аварга тариаланч С.Алтангадас, Б.Мөнхбат, Аймгийн алдарт уяач Д.Жаргалсайхан, М.Дамдинсүрэн, Н.Өлзийбүрэн, Л.Батбаяр. Мөн сумын аварга тариаланч, малчин, фермер, саальчин, алдарт уяачид маш олноор төрөн гарсан.

Одоо тус баг нь 426 өрхийн 1315 хүн амтай , 33842 толгой малтай, нийт өрхийн 80% нь мал аж ахуй газар тариалан эрхэлж өрхийн орлогоо бүрдүүлдэг. Багийн нутаг дэвсгэр дээр Борнуур ХК, Төв урлан ХК, Голден сойл ХХК, Борнуур трейд ХХК, Борнуур фүүдс ХХК, Борнуур эко хүнс ХХК, Бэрх-Оч ХХК, Харганахан хайрхан ХХК, Шинэ даваанбулаг ХХК, Арвин шимт ундарга ХХК, Урьд баян төгөл ЗБН, Цаст өгөөмөр хайрхан хоршоо, Хөх загал нөхөрлөл гэх мэт аж ахуй нэгж, нөхөрлөл, хоршоонууд үйл ажиллагаа явуулж байна. Одоо багийн Засаг даргаар П.Очирсүрэн, багийн Иргэдийн нийтийн хурлын даргаар Д.Өлзийсайхан нар ажиллаж байна.